Պատանի քիմիկոսների մրցաշարի համայնքի աշխատաժողովը մրցաշարից առաջ - Նորություններ | «Այբ» կրթական հիմնադրամ
  • Պատանի քիմիկոսների մրցաշարի համայնքի աշխատաժողովը մրցաշարից առաջ

Պատանի քիմիկոսների մրցաշարի համայնքի աշխատաժողովը մրցաշարից առաջ

20 Ապրիլի / 2021

Պատանի քիմիկոսների մրցաշարին ընդառաջ «Այբ» կրթական հիմնադրամը կազմակերպել էր աշխատարան մարզիչների և մրցաշարի թիմերի անդամների համար՝ «քիմիական» մարտերին լավ պատրաստվելու և տպավորիչ արդյունքներ ունենալու համար։  Պատանի քիմիկոսների ազգային և միջազգային մրցաշարերին մասնակցած և բազմիցս հաղթած թիմերի մարզիչ Սոնա Սիմոնյանն աշխատարանի 57 մասնակիցներին (աշակերտներ և մարզիչներ) ներկայացրեց իր փորձն ու դիտարկումները։ Նրան էին միացել նաև մրցաշարին որպես աշակերտ, հետագայում որպես ուսանող մասնակցած, ինչպես նաև միջազգային մրցաշարերում ներկայացած Րաֆֆի Շահմուրադյանը և Էմմա Մարտիրոսյանը, ովքեր խոսեցին մասնակիցների տեսանկյունից մրցաշարին պատրաստվելու նրբությունների մասին։  

 

Սոնա Սիմոնյանը Պատանի քիմիկոսների մրցաշարերում ներգրավված է 2012 թվականից․ այս ընթացքում հասցրել է մարզել տարբեր դպրոցների տարբեր թիմեր։ Մասնակցության տարիներին տիկին Սիմոնյանը կուտակել է հարուստ փորձ ինչպես հայաստանյան, այնպես էլ միջազգային մրցաշարերից և պատրաստ էր կիսել փոքրիկ նրբություններն ու գաղտնիքները, որոնք կօգնեն և՛ նորեկ թիմերին, և՛ փորձառու թիմերին ավելի լավ պատրաստվելու և մասնակցելու։  Տիկին Սիմոնյանը մատնանշեց մրցաշարին մասնակցելու համար գիտական պատրաստվածության կարևորությունը, գիտական գրականության ընթերցանության, ինչպես նաև մաթեմատիկայի և բնագիտական առարկաների իմացության անհրաժեշտությունը։ Մարզիչը կարևոր է համարում նաև բանավիճելու լավ հմտություններն ու գեղեցիկ խոսքը, ինչպես նաև մարզիչների դերը երեխաներին ոգեշնչելու՝ նրանց մեջ գիտության հանդեպ սեր առաջացնելու գործում։ Ոչ պակաս կարևորվեց նաև բանավեճերի դիտարժանության ապահովումը:

 

Այս տարվա Պատանի քիմիկոսների մրցաշարի վարողներից և խաղարկվող հարցերի հեղինակներից Րաֆֆի Շահմուրադյանը մասնակիցներին փոխանցեց գործնական խորհուրդներ և ներկայացրեց մրցաշարին պատրաստվելու իր «ալգորիթմը»։ Րաֆֆին նախորդ մրցաշարին խաղարկված «Ալկալոիդներ» հարցի օրինակով բացատրեց մասնակիցներին, թե ինչպես է պետք բանալի բառերի միջոցով փնտրել և գտնել հավաստի գիտական հոդվածներ, ինչպես դասակարգել և ծաղկաքաղ անել հոդվածներից՝ խոսքը հնարավորինս համոզիչ կառուցելու համար։ Հաջորդիվ քիմիայի միջազգային մրցաշարի մասնակից Սոնա Սարգսյանը ներկայացրեց խաղարկված թեմաներից մեկը, որին հետևեցին ելույթի ընդդիմախոսությունը և գրախոսությունը: Այդ գործընթացներն իրականացնող Րաֆֆին և Էմման ցուցադրեցին ընդդիմախոսելու և գրախոսելու իրենց հմտությունները, հարց տալու և պատասխանելու առանձնահատկությունները։


Աշխատարանի կազմակերպիչները, բանախոսները և մասնակիցներն ընդգծեցին Պատանի քիմիկոսների մրցաշարի նշանակությունը սովորողների համար քիմիան փոքր տարիքից հետաքրքիր դարձնելու, հետագայում նաև որպես մասնագիտական ուղղություն ընտրելու համար։ 

Մրցաշարի կայացման մեջ մեծ ներդրում ունեն Պատանի քիմիկոսների մրցաշարի հովանավոր «Պրոֆխոլոդ» ընկերությունը։ Սա վկայում է, որ մասնավոր ընկերությունները կարող են մեծ ներդրում ունենալ գիտական մտքի զարգացման և դրա գործնական արտահայտման մեջ։


Հիշեցնենք, որ Պատանի քիմիկոսների մրցաշարի եզրափակիչ փուլը կայանալու է մայիսի 9-ին, և քիմիայի բոլոր սիրահարները կարող են հետևել տպավորիչ մարտերին «Այբ» կրթական հիմնադրամի ֆեյսբուքյան էջով։

Ծանոթացի՛ր մեր ծրագրերին